الجمعة، 2 أبريل 2010

Get set 2

صباح الخير عالجميع

أدري ان صارلي وقت طويل غاطة .. وفجأة طليت عليكم بطلتي البهية

أول شي الشكر الجزيل لأخوي المدون والاعلامي أحمد الحيدر لسؤاله

بصراحة ما أدري شنو أكتب في هالبوست .. صارلي فترة افتح المدونة وما عندي شي أقوله وحتى لو عندي حاسه نفسي ماني قادرة أصيغ جملة

انشغلت الفترة اللي طافت بكتابة الرسالة .. ووصلت بتاريخ 10/3 للبحرين وعلى أولي وديت شغلي حق مشرف رسالتي واللي كتبت منه فصلين .. شهر كامل حكرت نفسي أيمع بهالمراجع واقرا وقهوه وسهر ورد بل وحكره

عشان ايي البحرين وينقال لي ( ايه ده يا بنت بطنها .. فين باقي الشغل؟)

ما ادري ليش حسيت ان رسالة الماجستير المفروض الواحد يخلصها بشهرين بهالكلمة .. حاشني احباط مو طبيعي ومن تاريخ 14/3

وانا كل ما فتحت اللابتوب عشان أقرا اييني النوم حتى لو كنت توني قاعده من النوم فارجع انام مرة ثانية ههههههههههه

والله بدون مبالغة هذا اللي صاير .. حاليا انا قاعدة ادون لكم .. لكن ادري بس افتح شغلي عشان اكتب جملة وحده راح ادوخ قبل ما اكملها .. لا قهوة نافعة ولا رد بل .. ما ادري اذا مطوله على هالحالة ولا لا بس ان شاء الله ما تطول السالفة

اللي يمر من هني يعطيني تفسير حق هالحالة وعلاجها بارك الله فيكم

أشوفكم على خير

الخميس، 10 ديسمبر 2009

خطة البحث .. Get Set !

السلام عليكم ورحمة الله

يا رب الجميع بخير ..

المدونة هذي .. بدا دورها الفعلي بالنسبة لي .. راح استخدمها كمساحة تنفيس بهدف توثيق للمرحلة اللي أعيشها الحين في الغربة في اعداد الرسالة من A to Z

الفترة هذي انا بصدد اعداد خطة البحث .. وكلي أمل اني اقدر اقدمها قبل موعد السمينار المقترح تاريخ 14/12

من أربع ايام ومن يوم بلش الشغل يصير جد .. وانا متعومسه لول

انا اللي مختارة الموضوع .. وانا اللي مصرة عليه .. وحابته وايد وايد .. وعلى الرغم من اني راسمة اهدافي وعارفه شلون اوصل لها وهم متوترة ليش ما أدري

بابتدي الحين" الخميس"
اكتب : مشكلة البحث ، أهمية البحث ، أهداف البحث ، تساؤلات وفروض البحث ، منهج ونوع البحث ، مجتمع وعينه البحث ، أدوات البحث ، التبويب المقترح ، والمصادر والمراجع اللي عندي

لكل من يمر من هنا
ادعي لي بالتوفيج
.
.
.
أشوفكم على خير

الجمعة، 30 أكتوبر 2009

إذا بعض الألم باقي .. ترى بعض الأمل ماراح

صباحكم ورد



ها نحن عدنا ننشد الهولو على ظهر السفينة ..



ورجعت للبحرين الحبيبة .. عشان أكمل آخر مشوار لي مع الدراسة .. الجزء الأصعب .. وهو كتابة الرسالة



شوفوا شلون مر الوقت بسرعة تبارك الله



في الفترة اللي طافت كنت بحالة أشبه بالكابوس بالنسبة لي وكان عندي هاجس اختيار عنوان الرسالة



كثيرة المواضيع اللي كانت في بالي .. ووايد محاولات لي بعد اقناع نفسي في عنوان معين في اقناع الدكتور في موضوعي



وأغلبها قوبل بالرفض أو الحط من العزيمة .. او باختصار الفشل .. وعرفت ليش بالنهاية .. لاني باختصار ما فكرت بالشيء اللي انا ابيه ..



بس قدرت أخيرا اني اتوصل حق شيء انا بالفعل ابي اكتب عنه .. وحصلت على تأييد من مشرف رسالتي أخيرا على الموضوع مع بعض التوجيهات والنصايح أكيد وطلب مني بلورة فكرتي واني ابتدي بكتابة البروبوزل



في اول يوم وصلت فيه البحرين .. من المطار لي البيت حطيت اغراضي ورحت لدورة مسجلة فيها الدورة كانت عن الـ NLP أو البرمجة اللغوية العصبية مدتها ثلاث أيام



في الدورة هذي ومن اليوم الأول تعلمت أشياء وايد ما أعرفها .. وسمعت أشياء وايد كنت أعرفها بس كنت بالفعل محتاجه أسمعها مرة ثانية ..



حضرت اليوم الأول واليوم الثاني وبخلال هالفترة واجهت تحديات كبيرة على الصعيد الشخصي لدرجة اني ما قدرت اروح اليوم الثالث.. سبحان الله .. يمكن رب العالمين خلاه يكون تمرين حي على اللي اخذته باليومين الاول والثاني.. أثناء هالظروف .. كان مأزمني احساسي بالغربة .. ولهت على ريلي .. وكل ما تذكرت احساسي حزة الـ take off احس بنفس شلعة اليوف اللي حسيت فيها ...

لــكــن في اليوم الثالث قعدت بيني وبين نفسي وتذكرت الكلام كله اللي انقال في المحاضرة الأولى والمحاضرة الثانية



واستنتجت ان مهما تكون الحالة النفسية اللي احنا فيها صعبة .. والتحديات اللي تواجهنا كثيرة .. نــقــدر .. نتغلب عليها .. ونــقــدر نحول نفسنا من حالة إلى حالة إذا احنا نبي .. وإذا احنا نبي نقدر نحول طاقتنا السلبية لطاقة ايجابية

وننجز .. ونبدع .. قعدت اردد بيني وبين نفسي
شغلة قلتها من زمان بعدها حسيت باحساس أفضل






.
.
أشوفكم على خير
.
.
.

السبت، 14 فبراير 2009

Turkey here i come

صباحكم ورد





صباحكم حب













صباحكم جوري أحمر













انا في اجازة رسمية بدت أول أمس




























أبشركم النتايج الحمدلله تسر (نوعا ما)











خلصت امتحانات من هني وسويت جنطتي من هني














ريحت يومين












وهووووبا على المطار









وين ؟؟














تركيا .. وين بالتحديد ؟؟ بيبك













الجو مو طبيعي .. يعني دفترك وقلمك وشكرا













.

.







وصلت مطار استنبول الفير عين مبطله وعين مسكره




وانصدم بالممرات اللي يطرد فيها الخيل



بس الحمدلله المسافرين اللي معانا عالطيارة طلعوا كلهم كسالا



مافي احد على اليسار لول























.






.









طبعا وصلت ما اشوف شي


ما ابي إلا فراشي .. ونمت ( قتيـــــلة )


.


.

.



قعدت ثاني يوم فتحت عيني على هالمنظر




.

.











.



.




.





ما هياني قلبي .. قلت أقوم اطل من البلكون


.


وهذي بلكونة داري










.





.

.

.





هذا فريجنا بالليل

.

.

.









.









.




وهذا فريجنا بالنهار



.




.



.

















.

.

.

طلعنا نتمشى في مجمع اسم (آك مركز)

.

.

سوقتهم حلوه بس لحد يقص عليكم يقول لكم ارخص من الكويت

.

.

.

مرينا على الهوم ستور (قهوه وبنفس الوقت محل)

شربنا فيها الجاي التركي

عجـيـــب



.

.

هذا الهوم ستور كافيه



.

.



.
.
.

راح اكمل لكم الباجي بالحلقة الياية لازم اطلع الحين

.
.
.
.
محدثتكم من بطن الحدث

بنت بطنها

استانبول

الخميس، 5 فبراير 2009

بوست بعز الامتحانات .. ليش يعني؟

صباحكم ورد
ورضا .. صباح معطر بذكر الله

بين زحمة الدفاتر والورق
ومع تعدد الأقلام وألوانها
وصفحة مجفوسة
ودفتر ذاك الصوب على السرير
وورقة طايحة بالقاع
وقبل 14 ساعة من وقت امتحاني
مع زحمة الأفكار
سؤال صار يحن في بالي
مثل حنة الورد الطائفي للي ما ريحته
ومثل حنة الياهل الدعلة على أمه في يمعة حريم اشتدت وحلت فيها السوالف
ومثل حنة الريل على الطلعة والمرة بعز لبسها ومكياجها
ومثل حنة المرة على الخدامة لا شرّف أول ياهل
البنوك وبيت التمويل على أقساطهم
تبون أمثلة بعد؟؟
قاعدة لي الصبح ترى
السؤال يقول
ليش ؟؟
.
ليش ما يحلى الأكل والتفنن بالمشاريب
ما يبقى جاي أخضر ولا يبقى نسكافيه ديكاف ولا يبقى كابتشينو
إلا وقت الامتحانات؟
.
ليش ما يهل السنع والترتيب وتنظيف البيت
وغسال الثياب
إلا وقت الامتحانات؟
.
ليش ما تحلى السباحة والسشوار والتدهن والتعطر
إلا بوقت الامتحانات؟
لا وبعد بغيت أقوم احط روب وعسل بويهي
(من متى يمه؟؟ لوول)
.
ليش ما يحلى المسلسل المليق اللي ما أفكر أطالع مشهد واحد منه
إلا بوقت الامتحانات؟
.
ليش ما تحلى قعدة البلكون والتطمش على الرايح والياي
مع العلم إني نادر ما أطلع البلكون
إلا بوقت الامتحانات؟
.
ليش ما يحنج الإلهام .. وتتخطرف دار مدار ذهني أجمل الجمل الشعرية
إلا بوقت الامتحانات؟
(على ما أهد السطر اللي قاعدة أقراه وأمسك القلم عشان اكتبها إلا وطارت الفكرة من بالي من زود النحاسة اللهم يا كافي؟)
.
ليش ما يطرون عليك الناس اللي من زمان ما كلمتهم ويتفجر فيك الوله والشوق .. وصلة الأرحام تصير مقطعة بعضها عندك
وتقوم تمسك التلفون وتتصل تسلم على الأكو والماكو
إلا بحزة الامتحانات؟
.
والأدهى من ذلك
ليش ما يحلى التدوين
(وتواريخ البوستات تشهد )
إلا بوقت الامتحانات؟؟
عادي اتم اكتب البوست هذا لي الصبح ترى لول
.
أحد فيكم يعطيني جواب مقنع بارك الله فيكم
.
.
ادعولي بالتوفيج
.
.
وأشوفكم على خير يا رب

الأحد، 16 نوفمبر 2008

رجل يحمل مشاعر Tagged me

السلام عليكم ورحمة الله وبركاته

شلونكم جميعا ؟؟ بصراحة افتقدت الجميع بدون استثناء .. وولهت على نفسي معاكم :)

اجازة تدوينية خارجة عن ارادتي اضطريت ابتعد شوي عن عالم التدوين واعتذر لكل اللي متابعتهم على قلة متابعتي بالفترة اللي طافت .. وأشكر جميع من مر على كشاكيلي ابتداءا من في خاطري كلمة وانتهاءا بـ وتر سادس ..
ولكل من ترك لي سؤال أو دعالي بغيابي .. ألف شكر

ردتي كنت مخططة فيها اني اكتب عن الفترة اللي مريت فيها لكن اخوي العزيز

نبهني ان مفرودلي* واجب من ثلاث اسابيع وما كنت ادري عنه .. باغتنم الحين الفرصة واعتذر له عن التأخير وعسى الله يعيني واحل الواجب :
بدأت تدون من إمتى ؟ ودخلت العالم ده إزاي ؟
بدايتي كانت بشهر ابريل اللي فات .. قبلها كنت ادخل اقرا البوستات من وقت لي الثاني وما قررت اني أدون إلا بعد ما بدت دراستي الفعلية بمملكة البحرين ومع الغربة والبعد عن الأهل ما حسيت بنفسي إلا وانا امتلك اربع مدونات :)
أيه كان انطباعك في البداية ؟
في البداية بكل صراحة وبدون أي رتوش كنت مثل الياهل اللي مداوم أول يوم بالروضة مستغربة وما ادري شاكتب وابدي من وين
كنت متعودة على المنتديات والكتابة فيها لكن بصراحة عالم التدوين مختلف بعض الشيء من اكثر من ناحية من ضمنها مراقبة ردود الأفعال ..
من أكثر شخص بتهتم بتعليقه على ( بوستك ) الجديد ؟
بصراحة ما عندي احد معين اهتم بتعليقه أكثر من غيره .. كل التعليقات بالنسبة لي مهمة مهما كانت ومنو ماكانو اصحابها ..
لكن بصراحة في اشخاص لازم اعدل قعدتي وانا اقرا تعليقاتهم لول
في اشخاص ادور تعليقاتهم من بين التعليقات
في اشخاص اتنطر تعليقاتهم على مواضيع معينه او مدونات معينة
في اشخاص اذا ما لقيت تعليقاتهم في بوستاتي احس في شي ناقص
ما هو أهم شيء تعلمته من عالم التدوين ؟
تعلمت اني اكون واضحة مع نفسي قبل لا اكون واضحة مع الآخرين
وعرفت أن بامكاني اني احس بغيري .. افرح لفرحهم واحزن لحزنهم واتفاعل مع مشاعرهم ومشاكلهم بدون اي سابق معرفة فيهم
ما هو أكثر شيء كرهته في عالم التدوين ؟
بكل صراحة ما كرهت شي بعالم التدوين ..
التدوين بالنسبة لي مثل دفتر اليوميات .. الفرق الوحيد ان مو بس انا اللي اقراه
هل تشعر أن التدوين له تأثير؟
له تأثير كبير لدرجة ان اصبح في فترة من الفترات جزء من حياتي اليومية
تهدي ( التاج ) ده لمين ؟
انا افرود الهوم وورك هذا لكل من :
أبو لطيف
Eng.F
Kuwait
Yin
Sweet revenge
كلمة أخيرة : رجل يحمل مشاعر .. ألف شكر لك ما قصرت ياخوي .. واتمنى ان اجاباتي ماكانت مملة :)
راح ارجع باذن الله بمواضيع يديدة
اشوفكم على خير
* فرودلي : لغير الناطقين بالكويتي الانترنتي تعني .. عمل فوروورد farward

الجمعة، 17 أكتوبر 2008

نبني عقول .. تبني بلد

السلام عليكم ورحمة الله

اتمنى ان الجميع يكون بخير

في اسبوعي الأول ما ادري ليش حسيت باحساس غريب .. ربكة .. مع شوية تخبط .. يعني الوضع بالضبط مثل الياهل اللي مودينه الروضة لأول مرة مع إنه ثالث كورس لي

...

في احدى المحاضرات مع دكتوري المفضل .. وأثناء نقاش الدكتور عن الاعلام ووسائل الاتصال الالكترونية والعولمة وغيرها طرح سؤال .. قال " ليش احنا دول العالم الثالث (ولو اني ما احب هالتسمية) شعب مستهلك بالدرجة الأولى حتى للأفكار" .. وعطى أمثلة من أبسطها عدد الكتب والاختراعات اللي تنتجها الدول المتقدمة. تناقشنا انا وزملائي معاه بهذا الخصوص وكانت وجهة نظري بالموضوع بعد ان كسرت المعادلة وبسطتها ان المشكلة نشأت من التعليم.
قلت له : لأننا شعب تربينا على أن نحفظ الكتب ونسترجع ما حفظناه وقت الاختبار وبعدها ننساه ونادر ما يعلق شي بالذاكرة ..
وانا اجاوب تذكرت ملامح من القصايد اللي حفظتها وانا بالمتوسط ولا كنت أفهم بعض معانيها
تذكرت شلون المدرسات كانوا ما يرضون إلا بإجابة نموذجية " مثل ما نقلتكم كتبوا" .. تذكرت ان اي معلومة اضافية حتى ولو كانت صحيحة راح تلقى جبالها اشارة ×
وغيرها وغيرها من الملامح .. بعدها على طول استرجعت دراستي بأمريكا وشلون انصفق ويهي أول مرة امتحن بنظام الـ Open book وشلون أول مرة أسوي فيها بحث بدون لا أنقله من أوله لي آخره من الكتب
وشلون كانت في درجات بونس لأفكارك ونقدك للقصة أو القصيدة وشلون مادة الأحياء كانت مثل النشاط تفكر ، تجرب ، تقتنع واحتمال ما تقتنع (لأنه مو غصب) وغيرها وغيرها
صحيت على صوت الاستاذ يجاوبني:

" بالضبط .. احنا لابد ان نبني عقول تبني لنا بلد "

ما مداني استفقت إلا ورجعت سرحت مرة ثانية بكلمته .. وما أجذب عليكم لازالت الكلمة ترن باذني من يومها

السؤال .. هل من الممكن أن لا نتجه للحلول السريعة .. هل من الممكن أن نستغني عن الخبرات الأجنبية ونوظف خبرات أو كفاءات محلية قادرة على بنيان البلد هل من الممكن أن تكون دولتنا تضم عدد كبير من المخترعين والمفكرين ؟؟ (بدون ما يظهر لنا واحد او اثنين تنهال عليهم عروض من شركات اجنبية اما لشراء الفكرة أو للتوظيف بالتالي مضطرين يوافقون لانهم ما لقوا دعم داخلي)؟
وأسئلة كثيرة تدور في بالي .. لدرجة اني حاسة بصداع حاليا

سؤال المليون .. هل من الممكن أن نبني عقول تبني لنا بلد؟؟؟


أشوفكم على خير