الخميس، 5 فبراير 2009

بوست بعز الامتحانات .. ليش يعني؟

صباحكم ورد
ورضا .. صباح معطر بذكر الله

بين زحمة الدفاتر والورق
ومع تعدد الأقلام وألوانها
وصفحة مجفوسة
ودفتر ذاك الصوب على السرير
وورقة طايحة بالقاع
وقبل 14 ساعة من وقت امتحاني
مع زحمة الأفكار
سؤال صار يحن في بالي
مثل حنة الورد الطائفي للي ما ريحته
ومثل حنة الياهل الدعلة على أمه في يمعة حريم اشتدت وحلت فيها السوالف
ومثل حنة الريل على الطلعة والمرة بعز لبسها ومكياجها
ومثل حنة المرة على الخدامة لا شرّف أول ياهل
البنوك وبيت التمويل على أقساطهم
تبون أمثلة بعد؟؟
قاعدة لي الصبح ترى
السؤال يقول
ليش ؟؟
.
ليش ما يحلى الأكل والتفنن بالمشاريب
ما يبقى جاي أخضر ولا يبقى نسكافيه ديكاف ولا يبقى كابتشينو
إلا وقت الامتحانات؟
.
ليش ما يهل السنع والترتيب وتنظيف البيت
وغسال الثياب
إلا وقت الامتحانات؟
.
ليش ما تحلى السباحة والسشوار والتدهن والتعطر
إلا بوقت الامتحانات؟
لا وبعد بغيت أقوم احط روب وعسل بويهي
(من متى يمه؟؟ لوول)
.
ليش ما يحلى المسلسل المليق اللي ما أفكر أطالع مشهد واحد منه
إلا بوقت الامتحانات؟
.
ليش ما تحلى قعدة البلكون والتطمش على الرايح والياي
مع العلم إني نادر ما أطلع البلكون
إلا بوقت الامتحانات؟
.
ليش ما يحنج الإلهام .. وتتخطرف دار مدار ذهني أجمل الجمل الشعرية
إلا بوقت الامتحانات؟
(على ما أهد السطر اللي قاعدة أقراه وأمسك القلم عشان اكتبها إلا وطارت الفكرة من بالي من زود النحاسة اللهم يا كافي؟)
.
ليش ما يطرون عليك الناس اللي من زمان ما كلمتهم ويتفجر فيك الوله والشوق .. وصلة الأرحام تصير مقطعة بعضها عندك
وتقوم تمسك التلفون وتتصل تسلم على الأكو والماكو
إلا بحزة الامتحانات؟
.
والأدهى من ذلك
ليش ما يحلى التدوين
(وتواريخ البوستات تشهد )
إلا بوقت الامتحانات؟؟
عادي اتم اكتب البوست هذا لي الصبح ترى لول
.
أحد فيكم يعطيني جواب مقنع بارك الله فيكم
.
.
ادعولي بالتوفيج
.
.
وأشوفكم على خير يا رب

هناك 13 تعليقًا:

Sweet Revenge يقول...

يا هلا ويا مرحبا بنت بطنها
اااااايه كانت تحوشني هالحالة شكثر
ههههههه يعني عادي وضعج طبيعي
يمكن حيله من العقل علشان يشحن ,يشغلك باشياء مايبيلها مجهود عقلي
شدي حيلج ويارب ناجحة وA بعد

Salah يقول...

كل هذا امتحانات!؟

kuwaitawy يقول...

انتي وينج؟؟؟

اوالله لج وحشه وفقدناج



قبل اسبوع رحت مع ولد خالي البحرين كان عنده دوام وقلت بروح معاه بشوف الجو الدراسي هناك شلون صاير

وانتي طريتي على بالي :)


------------


الله يوفقج يارب


الله يوفقج يارب


الله يوفقج يارب

بـنـت بـطنـهـا يقول...

سويته يا هلا وغلا

واي سكتي الله لا يعودها من ايام لول زين ما ينيت وقعدت حزتها
على قولة اختي تقول هذا ابليس الدراسة لوووول
والله يسمع منج ان شاء الله خل تطلع النتايج بس لان الحين تشتغل محاتاة النتايج ادري
اللي ما عنده شي يحاتيه يخلق له شي يحاتيه من تحت القاع لول

نورتي يا قلبي مس يو :*

بـنـت بـطنـهـا يقول...

صلاح اهلين وسهلين وعاش من شافك ياخوي

الامتحانات كان مدتها اسبوع بس

انت قصدك عن الفترة اللي غطيت فيها يعني

كنت لاهية بالبحوث حزتها لا تلومني :(

نورت البوست ياخوي

بـنـت بـطنـهـا يقول...

كويتاوي

يا هلا وغلا وعاش من شافك خيوو وانت اللي لك وحشه والله عساك ما تفقد غالي

زين انا اشوف البحرين ليش كانت منورة

اهم شي قولي عسى يازلك الجو الدراسي؟ لوووول

وبعد عمري ما قصرت على هالدعوة بردت قلبي اجمعين يا ربي ويوفق الجميع يا رب

Blog 3amty يقول...

موفقة يا رب

قلب طفله يقول...

وااااااي هذا اللي يصير معاي وقت الامتحانات كل شي يحلى بعيوني حزتها لا و انط من مكان لمكان و لمسكت الكتاب حاشني السرحان و فقدان الذاكره للي حافظته :s

الله يعينج و يوفقج يااااارب

و الله فقدناج خيتوو

بشرررررري لطلعت النتيجه

:**

Manal يقول...

موفقة يالغالية
:)

بـنـت بـطنـهـا يقول...

ولد اخو عمته

يا هلا وغلا واجمعين يا رب

بـنـت بـطنـهـا يقول...

قلب طفلة

يا هلا وغلا

اييييي بالضبط بالضبط هذا بالضبط اللي كان يصير معاي لول الحمدلله اني افتكيت وخلصت

نورتي يا الغالية

بـنـت بـطنـهـا يقول...

منال

يا هلا وغلا اجمعين يا ربي

نورتي البوست

غير معرف يقول...

1xbet korean 1xbet korean 1xbet korean 1xbet 1xbet
1xbet korean 1xbet deccasino korean 1xbet 1xbet korean 1xbet korean 1xbet 1xbet korean 1xbet 1xbet 1xbet 1xbet 1xbet 1xbet 1xbet 1xbet 1xbet kadangpintar 1xbet 1xbet 1xbet 1xbet 1xbet 1xbet 1xbet 1xbet 1xbet 1xbet