رجل يحمل مشاعر Tagged me

السلام عليكم ورحمة الله وبركاته

شلونكم جميعا ؟؟ بصراحة افتقدت الجميع بدون استثناء .. وولهت على نفسي معاكم :)

اجازة تدوينية خارجة عن ارادتي اضطريت ابتعد شوي عن عالم التدوين واعتذر لكل اللي متابعتهم على قلة متابعتي بالفترة اللي طافت .. وأشكر جميع من مر على كشاكيلي ابتداءا من في خاطري كلمة وانتهاءا بـ وتر سادس ..
ولكل من ترك لي سؤال أو دعالي بغيابي .. ألف شكر

ردتي كنت مخططة فيها اني اكتب عن الفترة اللي مريت فيها لكن اخوي العزيز

رجل يحمل مشاعر

نبهني ان مفرودلي* واجب من ثلاث اسابيع وما كنت ادري عنه .. باغتنم الحين الفرصة واعتذر له عن التأخير وعسى الله يعيني واحل الواجب :

بدأت تدون من إمتى ؟ ودخلت العالم ده إزاي ؟

بدايتي كانت بشهر ابريل اللي فات .. قبلها كنت ادخل اقرا البوستات من وقت لي الثاني وما قررت اني أدون إلا بعد ما بدت دراستي الفعلية بمملكة البحرين ومع الغربة والبعد عن الأهل ما حسيت بنفسي إلا وانا امتلك اربع مدونات :)

أيه كان انطباعك في البداية ؟

في البداية بكل صراحة وبدون أي رتوش كنت مثل الياهل اللي مداوم أول يوم بالروضة مستغربة وما ادري شاكتب وابدي من وين

كنت متعودة على المنتديات والكتابة فيها لكن بصراحة عالم التدوين مختلف بعض الشيء من اكثر من ناحية من ضمنها مراقبة ردود الأفعال ..

من أكثر شخص بتهتم بتعليقه على ( بوستك ) الجديد ؟

بصراحة ما عندي احد معين اهتم بتعليقه أكثر من غيره .. كل التعليقات بالنسبة لي مهمة مهما كانت ومنو ماكانو اصحابها ..

لكن بصراحة في اشخاص لازم اعدل قعدتي وانا اقرا تعليقاتهم لول

في اشخاص ادور تعليقاتهم من بين التعليقات

في اشخاص اتنطر تعليقاتهم على مواضيع معينه او مدونات معينة

في اشخاص اذا ما لقيت تعليقاتهم في بوستاتي احس في شي ناقص

ما هو أهم شيء تعلمته من عالم التدوين ؟

تعلمت اني اكون واضحة مع نفسي قبل لا اكون واضحة مع الآخرين

وعرفت أن بامكاني اني احس بغيري .. افرح لفرحهم واحزن لحزنهم واتفاعل مع مشاعرهم ومشاكلهم بدون اي سابق معرفة فيهم

ما هو أكثر شيء كرهته في عالم التدوين ؟

بكل صراحة ما كرهت شي بعالم التدوين ..

التدوين بالنسبة لي مثل دفتر اليوميات .. الفرق الوحيد ان مو بس انا اللي اقراه

هل تشعر أن التدوين له تأثير؟

له تأثير كبير لدرجة ان اصبح في فترة من الفترات جزء من حياتي اليومية

تهدي ( التاج ) ده لمين ؟

انا افرود الهوم وورك هذا لكل من :

أبو لطيف

Eng.F

Kuwait

Yin

Sweet revenge

كلمة أخيرة : رجل يحمل مشاعر .. ألف شكر لك ما قصرت ياخوي .. واتمنى ان اجاباتي ماكانت مملة :)

راح ارجع باذن الله بمواضيع يديدة

اشوفكم على خير

* فرودلي : لغير الناطقين بالكويتي الانترنتي تعني .. عمل فوروورد farward

نبني عقول .. تبني بلد

السلام عليكم ورحمة الله

اتمنى ان الجميع يكون بخير

في اسبوعي الأول ما ادري ليش حسيت باحساس غريب .. ربكة .. مع شوية تخبط .. يعني الوضع بالضبط مثل الياهل اللي مودينه الروضة لأول مرة مع إنه ثالث كورس لي

...

في احدى المحاضرات مع دكتوري المفضل .. وأثناء نقاش الدكتور عن الاعلام ووسائل الاتصال الالكترونية والعولمة وغيرها طرح سؤال .. قال " ليش احنا دول العالم الثالث (ولو اني ما احب هالتسمية) شعب مستهلك بالدرجة الأولى حتى للأفكار" .. وعطى أمثلة من أبسطها عدد الكتب والاختراعات اللي تنتجها الدول المتقدمة. تناقشنا انا وزملائي معاه بهذا الخصوص وكانت وجهة نظري بالموضوع بعد ان كسرت المعادلة وبسطتها ان المشكلة نشأت من التعليم.
قلت له : لأننا شعب تربينا على أن نحفظ الكتب ونسترجع ما حفظناه وقت الاختبار وبعدها ننساه ونادر ما يعلق شي بالذاكرة ..
وانا اجاوب تذكرت ملامح من القصايد اللي حفظتها وانا بالمتوسط ولا كنت أفهم بعض معانيها
تذكرت شلون المدرسات كانوا ما يرضون إلا بإجابة نموذجية " مثل ما نقلتكم كتبوا" .. تذكرت ان اي معلومة اضافية حتى ولو كانت صحيحة راح تلقى جبالها اشارة ×
وغيرها وغيرها من الملامح .. بعدها على طول استرجعت دراستي بأمريكا وشلون انصفق ويهي أول مرة امتحن بنظام الـ Open book وشلون أول مرة أسوي فيها بحث بدون لا أنقله من أوله لي آخره من الكتب
وشلون كانت في درجات بونس لأفكارك ونقدك للقصة أو القصيدة وشلون مادة الأحياء كانت مثل النشاط تفكر ، تجرب ، تقتنع واحتمال ما تقتنع (لأنه مو غصب) وغيرها وغيرها
صحيت على صوت الاستاذ يجاوبني:

" بالضبط .. احنا لابد ان نبني عقول تبني لنا بلد "

ما مداني استفقت إلا ورجعت سرحت مرة ثانية بكلمته .. وما أجذب عليكم لازالت الكلمة ترن باذني من يومها

السؤال .. هل من الممكن أن لا نتجه للحلول السريعة .. هل من الممكن أن نستغني عن الخبرات الأجنبية ونوظف خبرات أو كفاءات محلية قادرة على بنيان البلد هل من الممكن أن تكون دولتنا تضم عدد كبير من المخترعين والمفكرين ؟؟ (بدون ما يظهر لنا واحد او اثنين تنهال عليهم عروض من شركات اجنبية اما لشراء الفكرة أو للتوظيف بالتالي مضطرين يوافقون لانهم ما لقوا دعم داخلي)؟
وأسئلة كثيرة تدور في بالي .. لدرجة اني حاسة بصداع حاليا

سؤال المليون .. هل من الممكن أن نبني عقول تبني لنا بلد؟؟؟

أشوفكم على خير

ها نحن عدنا ننشد الهولو على ظهر السفينة

السلام عليكم ورحمة الله وبركاته

لكم فرية بصراحة فقدتكم جميعا .. أتمنى ان الجميع بخير

قعدنا اليوم الفير وزهبنا اغراضنا وتوجهنا لـ طريج السفر

يا حلات السفر بالنهار أول مرة أجربه من الديرة

وهذا انا وصلت البحرين

وها نحن عدنا ننشد الهولو على ظهر السفينة

بكل نشاط وحماس أستقبل الكورس اليديد .. يارب يتم معاي لي آخر الكورس وما تطلع السالفة فزة خيل

راح أوافيكم بآخر الأخبار بكل بوست باذن الله

ادعولي بالتوفيج عاد :)

(وينج يا كويت) محدثتكم بنت بطنها من قلب شقتي

بغيت أبجي إلا شعرة .. إدمان؟؟

السلام عليكم ورحمة الله

اتمنى ان الجميع بخير .. اليوم قاعده بأمان الله اتصفح واتمشى بين المدونات فجأة تطلع لي رسالة بالاكسبلورر ان هذي الصفحة مو موجودة (cannot be displayed) يا غثه من مسج

قلت وليييه لايكون فصل الكونكشن بعد .. عادةً تحوش النت وورك لوثه ويفصل لدقايق ويرجع مرة ثانية

بعدها نطرت شوي جان اسوي رفرش ولا نفس الشي اطل عالماسنجر ولا شغال ما فصل قلت خل افتح اي صفحة اجيك .. فتحت مواقع ثانية فتحت معاي قلت اكيد عيل البلوق سبوت داون او شي .. قلت خل اتاكد عطيت احد اصدقائي بالماسنجر عنوان مدونة كنت اتصفحها جان يقولي شغاله . جان تطلع علامات استفهام بمخي قلت لايكون البحرين منعو التدوين بعد .. قمت وعطيته صديق لي من البحرين قلت له جيك واللي يرحم والديك دخل عالسايت فتح معاه .. جان يصير فيني جذيه :(

تميت اسوي رفرش ما رضى يفتح معاي .. طالعت الساعه ولا تسع وشي قلت لا لا بدعت انا صارلي ساعتين احاول .. قومي تعوذي من بليس ولبسي وطلعي .. لبست وطلعت واقرب سينما من بيتي

فلم (هانكوك) مال وليام سميث .. اهم شي اني قاعده بنص السينما وطايحتله عياط لووووووول الغريب اني وانا قاعده اتابع الفلم كل شوي اسأل نفسي تهقين لما تردين البيت راح تفتح المدونات معاج؟؟ طالعه تستانسين ولا طالعه تنغثين ؟؟؟ لول

رديت البيت على اولي على اللابتوب .. دخلت على مدونتي ولا هم ما تفتح .. جان اتأزم نفسيا .. ما يبقى كوكيز ما مسحت .. ما يبقى حركة بهلوانية ما سويت .. بغيت أبجي إلا شعرة .. شوي ولا اسوي رفرش ويفتح بروحه .. طبعا انصدمت شنو الحركة اللي سويتها خلته يفتح ما ادري .. وان شاء الله ما تنعاد هالحركة

لاني بكل أسف اكتشفت ان البلوق سبوتس عندي شي وايد مهم .. تهقون ادمان ؟؟؟

اللي عنده خبر شنو سالفه هاللوثه اللي حاشتني يقولي

أشوفكم على خير

حشرة مع الناس عيد

السلام عليكم ورحمة الله

طلعت نتايجي .. وكانت احسن من توقعاتي ولله الحمد
بالمادتين straight A's

طلعت من باب الجامعة وحسيت ولأول مرة بالفعل بكلمة " الأرض مو شايلتني"

ركبت السيارة دقيتها سلف ولا يشتغل الراديو قناة سوا ولا حاطين أغنية "i believe i can fly"

يااااااااه شنو الاحساس حلو .. قمت اهز راسي مع الأغنية من الوناسة

وقلت ماني رادة البيت لازم اطلع احتفل مع نفسي

رحت آكل بجليز .. والغريبة اني بالاسبوع عالاقل مره اكل فيه .. اول ما سألتني الويترس شنو تبين تاكلين جان اطالعها ماني عارفة شاكل لاني فجأة اكتشفت اني مو يوعانه لوووووووول
بس رديت عليها قلت لها عطيني أحسن شي عندكم .. ههههههه

لما مشت صفنت ..
تالي انكسر قلبي على روحي
وبدا احساسي بالفرحة شوي شوي يتلاشى

هل الانسان يحتاج إطراء عشان يحس بانتصاراته ؟
أو يتوقع دايما لأفعاله ردود أفعال ؟
أو انه محتاج وجود احد معاه عشان يشاركه فرحته ؟
ولا لأن انا دعله قاعدة أفكر بهالطريقة؟

شنو ماكان الجواب

إلا اني ادركت ان فرحة الانسان ما تدوم إذا كان بروحه ..
وجود الناس حولنا نعمه .. يشاركونا أفراحنا وآلامنا
ولا شلون قالوا حشره مع الناس عيد ؟

أشوفكم على خير

حـسـافـة

هذيان

فلا تعيروه اي اهتمام .. مجرد تنفيس لا أكثر

قالوا

.

.

لا طاح الجمل كثرت سجاجينه

.

.

وقالوا

.

.

الروس نامت والعصاعص قامت

.

.

وقالوا

.

.

لا غاب القطو العب يا فار

.

.

وقالوا

.

.

من حجالك يحجي فيك

.

.

وقالوا

.

.

خبطتين عالراس توجع

.

.

وقالوا

.

.

اللي ما فيه خير تركه اخير

.

.

وقالوا

.

.

العيب لا طلع من أهل العيب ....

.

.

وقالوا

.

.

من حط نفسه سبوس لعبت فيه الدياي

.

.

وقالوا

.

.

خير تعمل شر تلقى

.

.

وقالوا

.

.

ابوي ما يقدر إلا على أمي

.

.

وقالوا

.

.

حــــســــــافــــــــة

عاجل .. طلبة الجامعات الخاصة

طلبة الجامعات الخاصة .. داخل وخارج الكويت

مبروك نزلت لكم المكافأة بأثر رجعي

جيكوا حساباتكم

عدنا

عدنا والعود أحمد

بصراحة أخذت جم يوم انما ايـــه

لوووووووووووووووووووول

ضحك ضحكت بروحي

بجي بجيت بروحي

سوالف سولفت بروحي

بولنغ رحت لعبت بروحي

حتى جنجفه لعبت بروحي لووول

....

طبعا يزاه الله الف خير من عطاني هالنصيحة

وعلى طاري النصيحة خل أقول لكم جم شغلة

..

الحر ونشفة الريج والبشرة

بمناسبة الحر الغير معهود

طبعا احنا هني عندنا ذبحتنا الرطوبة بس حر الكويت اتوقع ناشف

يعني هالنصيحة راح تيوزلكم اكثر

لا تطلعون من البيت إلى وانتو ماخذين بطل ماي معاكم

لأن الدراسات اثبتت ان الماي البارد يقيك من الاصابة بعدة امراض

تسببها الشمس والهوى الحار وانا لاحظت ان يخفف من التوتر اللي يسببه الحر

....

الحر وسيارتي

قبل جم يوم اتصلت علي عمتي حبيبتي تسأل عني

مع السوالف قلت لها عمتي حررر حرررر

اطلع من البيت ما اقدر ابطل باب السيارة

ادخل السيارة السكان ما اقدر المسه من كثر ما اهو حار

عطتني نصيحة ذهبية .. عسى الله يخليها يا رب

قالت لي يمه انا لما كنت اداوم قبل كنت شاسوي؟

آنه : شتسويييين؟؟

عمتي : اخذ معاي فوطة صغيرة مبلله بماي بارد

انه : @@ .. بس بيني وبينكم اهي ما شافت لول

عمتي : عشان اقدر ابطل باب السيارة

ولا دخلت السيارة مسحت السكان بالفوطة عشان اقدر امسكه

انتي سيارتج يلد يمه ؟؟

انا : اي عمتي

عمتي : اي عيل حطيلج فوطه شوي عودة داخل السيارة

وكل ما ييتي تركبين فرشيها

لووووووووووول حاسه فيني

....

نصيحة .. اذا مو شايف فلم

The Last Samurai

ضروري تشوفه

انا اليوم لي سادس مرة اشوفه ما حسيت اني مليت منه

وكل شي بكوم وكوتسومو بكوم

احسه بهالفلم اكل الجو على توم كروز

شوفوه بالله

أقول يا زين الحامل والمحمول بس

....

استرخاء على ضمانتي

بعد محاضراتي اللي تدوم اربع ساعات يالله من فضلك

ارجع البيت متلخلخه .. " لغير الناطقين بالكويتي الفصيح " متلخلخه يعني متليشه لول

" تعبانه "

في اللي يحس بتعب .. او توتر .. او حتى sleeplessness

اتبع الآتي

اترس الحوض bathtube ماي دافي مايل للحرارة

ونقط فيه من 7-10 قطرات من زيت اللافندر " الخزاما "

اللي ما يقدر يلقاه صافي خل يستخدم زيت فواحة الشمع مثل اللي عند البدي شوب

وماله اي اضرار لما تستخدمه بهالطريقه

على ضمانتي

على ما يترس الحوض جود قبلها انت مبلل فوطه صغيره بماي بارد او جاي اخضر بعد ما يبرد

وحاطه بالفريزر

قبل لا تطب الحوض .. طلع الفوطة الصغيره من الفريز وطب وحط الفوطه على عينك

ولااااااااتفكر بشي ابدا

اذا ما قدرت تتحكم بعقلك .. شغل الخيال او الذاكرة

حاول تتخيل جو صافي بطبيعه معينه

او تذكر مكان هادي رحت له وحبيته

او حاول تتذكر او تتخيل اشياء زينه تصير لك

كوب بابونج راح يساعد وايد بعد

همسة للمدخنين : حاول انك ما تدخن قبل كوب البابونج بعشرين دقيقه على الاقل ولا تدخن بعده

بعدها بجامة .. وفراش على طول

واذا ودك تسمع شي

اسمع سلين

انا احس انها تدبخني هالاغنية لول

بس قصر عليه وحط راسك ونوم العوافي يا رب

أشوفكم على خير

بأغط .. وأرجع

مع التشويش الذهني اللي حايشني الجم يوم اللي طافوا بسبب الضغوطات اليومية والدراسية مع تضخيم الغربة .. وبعز ما الانسان يحس ان يبي شي بس ما يدري شنو اهو كتبت بالبوست اللي طاف " أوله على نفسي " والحمدلله من بين الردود لقيت اقتراح زوغه من اخوي Solaiman لقيت ان كلامه عدل المفروض اخذ بريك شوي عن النت .. حتى لو مو مسافرة بس باسافر في بيتي لوووووول .. سليمان قواك الله على الاقتراح جد بحاجه حق هالشي ..

فبأغط عنكم جم يوم وأرجع ان شاء الله بس عندي رجاء لكل من مر من هني وراح يمر .. لا تنسون الدعاء لوالدة اختنا الغالية Fskra عسى الله يشفيها يا رب ويشفي كل مريض .

أشوفكم على خير

أوله على نفسي

صباح الخير كلكم

اتمنى انكم تكونون كلكم بخير يا رب

تصدقون ما عندي شي اليوم

بس صارلي فترة ابي ادخل اتكلم لكن ما عندي شي اقوله

تصدقون احس ولهانه على شي ما ادري شنو اهو

ساعات اقول هذا الاحساس من الغربة

اسأل نفسي : تبين ترجعين ؟؟

ارد على نفسي : لا مابي أرد

قعدت يمكن نص ساعة اطالع الشاشة افكر شنو الشي اللي ولهانه عليه

اكتشفت بالنهاية اني ولهانه على نفسي

جد فاقدتها

في احد حاشه هالاحساس؟؟

أشوفكم على خير

ولهم كلمة

كان عندي مشروع حملة بمادة حملات الإعلام والعلاقات العامة

عرضت التخطيط على البور بونت وبعض الفيديوات اللي سويتها

هذا واحد منهم

إن شاء الله توصل الرسالة

.

.

ألف شكر لقروب العمل

ألف شكر للمذيع المتألق محمد الدغيشم

ألف شكر لكل من مر من هنا

التسويق للمنتج المحلي في ظل هيمنة المنتج الغربي

السلام عليكم ورحمة الله وبركاته

ياليت تحلون معاي الاستبيان التالي لان عندي بحث احتاج حق 200 مبحوث

في مادة الاتصال التسويقي .. عن المنتج المحلي في ظل هيمنة المنتج الغربي فياليت لو سمحتوا تجاوبون على اسئلة هالاستبيان ...

• عند ذهابك للتسوق .. هل تهتم إلى بلد صنع السلعة المراد شراؤها؟

- نعم - لا - أحيانا

• هل تفضل المنتج الغربي على المنتج المحلي؟

- نعم - لا - أحيانا • في حالة الاجابة بنعم لماذا تفضله ؟

- لجودته - سعره - شكله وتغليفه - لطريقة التسويق له - لرغبتي وثقتي فيه

• هل يحتاج المنتج الغربي عملية تسويق (دعاية) بحجم التسويق للمنتج المحلي؟

- نعم يحتاج بشده - نعم يحتاج -لا يحتاج

• اذكر من وجهه نظرك ماهي اهم العيوب التي تجعلك تعرض عن المنتج المحلي

• ماهي اقتراحاتك لزياده الاقبال على المنتج المحلي

نعم .. كانت عروس الخليج

كلام قريته وبأنقله

وياليت اللي سمعه ينقله

.

.

....

.

.

ــ الشعر كان يعيش أفضل عصوره لما رثى الشاعر ملا عابدين الشيعي الشاعر عبدالله الفرج السني.

.

ــ الموسيقى كانت تعيش أزهى عصورها لما كان التنافس بين ألحان سعود الراشد السني وألحان محمود الكويتي الشيعي.

.

- تسيدنا التجارة في الماضي لما كان نوخذة سني يبحر في بوم صنعه قلاف شيعي.

.

ــ الأغاني كانت أحلى على عود حمد خليفة السني ومرواس فاضل مقامس الشيعي.

.

ـ المسرح كان في قمته لأن الذي أسسه حمد الرجيب السني وأكمل مسيرته عبدالحسين عبدالرضا الشيعي.

.

ـ ما كان عندنا طائفية كريهة لأن صوت الأذان المرتفع يختلط بين مئذنتي مسجد المزيدي ومسجد بن رومي في شرق.

.

ـ ما كان عندنا طائفية كريهة لما كان الناس يحضرون مالد السيد الحنيان السني عن مقتل الحسين في الحسينية الخزعلية.

.

ـ كنا نعيش أزهى عصور الأدب عندما قام خالد سعود الزيد السني بتوثيق حياة الأديب عبدالرزاق البصير الشيعي.

.

ــ كنا نعيش الوحدة الوطنية لما يوسف البدر ويوسف الصبيح السنيان وزعا الأكل على الفقراء من السنة والشيعة في سنة الهيلق، ولما فتح عبدالوهاب الوزان الشيعي مخازنه لمحتاجي الكويت من السنة والشيعة خلال الغزو العراقي.

.

- وكنا أسياد الرياضة لما سجل فيصل الدخيل السني هدفا في كأس العالم من خلال تمريرة من عبدالله البلوشي الشيعي وسجل هذا الهدف باسم الكويت. المصدر

.

...............

.

الله أكبر عقب ما كنا جدّام ..

صرنا تلايا الناس ومحد ورانا

.

............

.

تعـال ويــا زمان إرجع .. تعبنا بوقتنا الحاضر

تغير كل شي فينا .. وصرنا يا زمان أغرااااب

.

..............

.

أشوفكم على خير

لونج .. من صباح الله خير

أحلى احساس لما تكون بالمطار
قاعد باللونج من صباح الله خير وتنطر وقت دخول الطياره عشان بترد ديرتك

يااااااااااااااا .. وكل شوي تطالع الساعة .. يااااااااااا احساس مو طبيعي ابدا

بس افضل شي لما تلقى كمبيوتر وتقعد تهذر وتهذر ويقزر عليك الوقت لما .. لحظة

نادوني هههههههههه .. لما ينادونك يقولون لك يالله اهو .. طيارتك بتطير

ادعولي اوصل بخير.

اشوفكم على خير

خلو سبيلي .. بأروح الكويت

قاعدة امشي بالسيارة واقلب بين السيديات الداثره اللي عندي .. وخبركم الواحد لا صار مسافر ولا بره ديرته الأغاني الداثرة تصير لها قيمة عند الانسان ولغير الناطقين بالكويتي الفصيح ( الداثر-الداثرة) تعني عندنا القديمة جدا ولا يعيبها شي . قلبت بالأغاني يمين يسار لين وصلت العدلية ما وعيت إلا (طم طاخ طاخ) طيران وبنقز وكمنجات . بدا اللحن جان يرف قلبي .. ادري وايد منكم ما مرت عليه هالاغنية فللي مرت عليهم شاركوني فيها واللي ما مرت عليكم سألو عنها لا تطوفكم ..

.

.

الأغنية تقول ..

.

.

خلو سبيلي وسيبوني على ما بغيت خلو سبيلي

لا تسألوني لوين أبغى بغيت الكويت فيها خليلي

لي ما تناسى جميلي لا يحسب اني بعهدي تناسيت

يا مودي الودايع اسألك بالله وديني عالكويت

..

الســالمية أبا فيها محله وبيت بجوار خـــلــي

لاسرحت بدري إلي عنده عشية طويت رجله برجلي

ولا سكن في حولي والأحمدي حيث ما يسكب الزيت

يا مودي الودايع .. اسألك بالله وديني عالكويت

..

البدع أعرف والمرقاب فيها بنيت لي ساس أصلي

كل من لقيت إسإله عني إذا ما دريت يخبرك عني

حتى الحمام المعلي والطير غنى معي يوم انا غنيت

يا مودي الودايع .. أسألك بالله وديني عالكويت

..

مشتاق مشتاق له من حر بعده اكتويت والكبد تغلي

والعين ما تنغمض كل ما ذكرت وبكيت وخبرت عقلي

وبكيت ما حد رثالي ورجعت مثله على الصبر جازيت

يامودي الودايع .. أسألك بالله وديني عالكويت

..

بيني وبينه سوى رحمة عليها مشيت وعساه مثلي

وعهود ما بعت شي فيها لاحد واشتريت لو راد قتلي

بالعهد اوصوني يا اهلي من باع عهده ندم او قال يا ليت

يا مودي الودايع .. أسألك بالله وديني عالكويت

..

..

كلمات المحضار .. واهو كان معروف بحبه للكويت ..

الله يرحمه يا رب

أشوفكم على خير

*ملاحظة: تم نقل هذه الرسالة إلى هذه المدونة وتم تقسيم المدونات